En 1992 a Asemblea Xeral das Nacións Unidas estableceu que o 22 de marzo de cada ano se celebraría o Día Mundial da Auga. O Día Mundial da Auga é unha ocasión única para lembrar que mentres nós menosprezamos un ben tan fundamental para a nosa vida, moitas persoas no mundo non teñen acceso á cantidade de auga potable necesaria para a súa supervivencia.
Nun mundo cuberto nas súas dúas terceiras partes por auga pode parecer un contrasentido que o difícil acceso á auga potable sexa causa de enfermidades e pobreza para 1.500 millóns de persoas.
Porén, esa é a realidade. A auga apta para uso humano (doce, potable e de fácil acceso) é unha parte moi pequena do total e a súa escaseza non se debe só ás condicións naturais de determinadas rexións, senón que ten moito que ver co aumento da poboación, a dilapidación e a contaminación.
A situación é preocupante e moitos expertos consideran a cuestión da auga como o desafío máis importante que debe afrontar a humanidade no século XXI. Ademais da auga para beber, a agricultura, a industria, a hixiene e a saúde, a calidade ambiental, etc., as posibilidades de desenvolvemento dun territorio e a súa poboación dependen da auga, da súa calidade e do seu consumo racional. O consumo medio de auga por habitante nun país industrializado como os Estados Unidos é de cerca de 2000 m3, mentres que nun país en desenvolvemento como Níxer é de 41 m3. Aos estudantes de economía, para distinguir os conceptos de valor e prezo, plantéxaselles a seguinte cuestión: Cal é o prezo da auga? E o seu valor?:
Un dato para a reflexión
O valor da auga
Un estudante despistado contestará que o prezo da auga é moi baixo, polo tanto vale pouco.
Un alumno máis espelido responderá que o seu prezo é baixo, si, mais o seu valor incalculable: sen auga non hai vida.
No noso propio país, un territorio que se caracteriza na súa maior parte polas escasas precipitacións (especialmente no verán), aínda é moi habitual o rego a manta, é dicir, inundando completamente os cultivos, co desperdicio de auga que iso supón.
Nunha aldea de Kenia, un neno debe camiñar durante varias horas ó día ata o pozo máis próximo para levar á súa familia uns poucos litros de auga. Esta familia mide moito cada cunca de auga e pénsao dúas veces antes de consumila.
Seguramente o valor que lle atribúe á auga o consumidor español ou a familia keniana será moi distinto. O relativo baixo prezo deste líquido en España fai que, o mesmo que o estudante despistado, non valoremos a súa importancia, non só para os seres humanos senón para toda a natureza.
A calidade ambiental do noso entorno e do planeta depende moito do uso que todos fagamos da auga, de tratala como o que é: fonte de vida.
Existen tantas maneiras de considerar, utilizar e conmemorar a auga como tradicións culturais arredor do mundo. Sagrada, a auga sitúase no centro de numerosas relixións e utilízase en diversos rituais e cerimonias. Durante séculos a auga foi tamén fonte de inspiración para a arte, que a representou a través da música, a pintura, a literatura e o cine. A auga constitúe tamén un factor esencial en diversos ámbitos científicos. Cada rexión do mundo ten a súa particular forma de consagrar a auga, pero todas recoñecen o seu valor e o lugar central que ocupa na vida humana. As tradicións culturais, as prácticas indíxenas e os valores sociais determinan a maneira na que as poboacións perciben e xestionan os recursos hídricos nas distintas rexións do mundo.
Referencias:
Das imaxes: © UNICEF
Do texto:
- Resolución da Asamblea Xeral das Nacións Unidas A/RES/47/193
(80 votos, media de 4 Sobre 5)
IV CARREIRA GOTAS PARA NÍXER (CEIP Paraixal VIGO-22 MARZO 2012)
Accede a recursos multimedia para utilizar na aula e descarga os cadernos de actividades para Ed. Infantil, Ed. Primaria e Ed. Secundaria.
Creative Commons(by)
