Poden formar parte do proxecto educativo de UNICEF centros educativos de educación formal, escolas deportivas, centros de educación non formal ou  institucións con algunha responsabilidade educativa. Incorporar o enfoque de dereitos da infancia en todos os ámbitos da vida da comunidade escolar servirá para adaptala a un mundo cambiante, con novos desafíos e conflitos. A perspectiva de dereitos axudaranos a non deixar a ninguén fóra e permitiranos conectar con outras realidades, tanto próximas como afastadas, que facilitarán o desenvolvemento de cidadás e cidadáns globais.

UNICEF impulsa un enfoque de centros solidarios que incorporan nos seus plans educativos a defensa activa dos dereitos da infancia, dando á participación infantil e xuvenil o protagonismo que merece. Se ben o centro escolar é o principal obxectivo do programa, tamén aquelas entidades e colectivos con fins educativos atoparán en Enrédate solucións á hora de desenvolver propostas de educación en valores. Para iso, ademais de ofrecer unha gran variedade de material educativo, propoñemos a participación na campaña escolar Gotas para Níxer e invitamos aos centros a formar parte do proxecto Escolas Amigas de UNICEF.

CENTROS ENREDADOS

Serán Centros Enredados aqueles que se rexistren na web enredate.org. Rexistrarse en enredate.org é gratuíto, sinxelo e permite:

• Formar parte da rede de centros educativos e docentes aliados de UNICEF.
• Acceder gratuitamente aos materiais educativos do programa.
• Recibir información personalizada.
• Publicar e compartir as experiencias realizadas no centro no Blog de Enrédate.
  

CENTROS COLABORADORES

Aqueles Centros Enredados que participen nalgunha das actividades propostas dentro das campañas educativas do programa enredate.org serán recoñecidos como Centros Colaboradores polo curso en que realicen dita colaboración.